Qoysaskii ka barakacay kismaayo oo gaaray deegaanno ka tirsan jubbada hoose

0
135

Qaar ka mid ah dadkii ka barakacay magaalada Kismaayo ee xarunta gobolka Jubbada Hoose oo ay toddobaadyadii la soo dhaafay ka taagnaayeen cabsi dagaal ayaa gaaray deegaanno ka tirsan gobolka, iyadoo meelaha ay dadkaan ka barakaceen cabsida Kismaayo ay gaarayaan ay ka mid tahay magaalada Muqdisho.

Deegaannada ay gaareen dadka waxaa kamid ah degmooyinka Jammaamme, Jilib, Kamsuuma iyo tuulooyinka ku yaalla jiinka wabiga jubbada, waxaase sidoo kale jira dad iyaguna gaaraya dhanka degmooyinka Afmadow iyo Dhoobley.

Qoysaska Kismaayo ka barakacay ee gaaray degmada Jammaame iyo Jiinka wabiga ayaa waxay u badanyihiin haween iyo carruur waxaana marka aad la hadasho ay kuu sheegayaan inay ka soo carareen cabsida k ajirta hareera magaalada, waxaana sidoo kale jira dhibaatooyin dhanka la qabsiga jawiga deegaanada cusub ee ay gaareen oo soo wajahay dadkaasi ka soo barakacay Kismaayo ee gaaray Jamaame iyo nawaaxigeeda, sida ay ERGO u sheegtay haweeney sidata sadex carruur ah oo kamid ahayd dadka Kismaayo ka soo barakacay ee Jamaame gaaray.

“Aniga waxaan ka soo barakacay magaalada Kismaayo, hadda waxaan joogaa degmada Jammaame, waxaan wataa 3-carruur ah, waxaan ahayn dad xoogsata ah, carruurta aabbahood Kismaayo ayaan uga soo tagay.” Ayay tiri haweeney ka mid ahayd dadkii barakacay.
Duqeymaha dhanka badda ah ee ay maraakiibta dagaalka ku hayaan magaalada Kismaayo ayaa sababay inuu gabi ahaanba istaago dhaqdhaqaaqii ganacsiga ee dekadda magaalada, waxaana arrintaasi ka dhashay inuu sare u kac ku yimaado qiimihii markii hore lakala siisan jiray noocyada kala duwan ee badeecadaha.

“Magaalada ganacsi kama jiro, xarumihii waxbarashada sidii la rabay uma shaqeenayaan, waxaa jira sare u kac aad u xooggan oo ku yimid qiimaha la kala siisan jiray maciishadaha suuqyada magaalada arrintaasna waxaa sabab u aha colaadaha ka taagan hareeraha magaalada.” Ayuu yiri qof ka mid ah ganacsatada magaalada oo u warramayay Idaacada Ergo, kana gaabsaday in magaciisa la xuso.
Ma ahan oo kaliya magaalada Kismaayo meelaha ay uu ka jiro barakaca ka dhashay colaadaha ka aloolsan hareeraha magaalada Kismaayo, ee waxaa sidoo kale jira dad badan oo reer miyi ahaa kuwaasoo ay si daran u saameeyeen colaadaha ka jira deegaannada ka tirsan gobolka Jubbada Hoose.

Deegaannada Miido, Cag-libaax iyo Harboole oo dhammaantoodba ku yaalla inta u dhaxeysa Afmadow iyo magaalada Kismaayo oo horay u ahaa deegaanno shiimo ah ayaa hadda haawanaya oo cidla ah, waxaana dadkii reer guuraga ahaa ee deegaannadaasi ku noolaa ay u soo hayaameen dhanka magaalada Afmadow, sida uu Ergo u sheegay guddoomiyaha maamulka degmada Afmadow Cabdixakiim Xaaji Cumar.

“Deegaanada ku yaalla inta u dhaxeysa Kismaayo iyo Afmadow dhibaato aad u xooggan ayaa ka jirta, maxaa yeelay halkaasi waxaa ku noolaa dad reer guuraa ah waxaana dadkii ay hadda billaabeen inay u soo barakacan Afmadow, waayo dagaallada ayaa saameeyay ilihii ay biyaha ka heli jireen, danta ayaa ku qasabtay inay Afmadow u soo qaxaan.”Ayuu yiri guddoomiyaha.

Dagaallo, duqeymo dhanka badda iyo cirka ah oo dadka ku nool magaalada Kismaayo cabsi galiyay ayaa maalmihii ugu dambeeyay ka taagnaa hareeraha magaalada, taasoo keentay in qaar ka mid ah dadkii magaalada ay barakac billaabaan.

Khadar Maxamuud Xareed/FM

Post your comments

LEAVE A REPLY

Please enter your comment!
Please enter your name here