Qoysas beeraley ahaa oo ku soo barakacay fatahaad uu dhowaan sameeyay webiga Shabeelle

0
164
Photo|Keydka/Ergo

Faadumo Maxamed Aadan, waxay ka mid tahay qoysaska ku soo barakacay degmada Qoryooley. Waxay sheegtay in ay ka dhamaatay toban kiilo oo bariis iyo sokor isugu jira oo guddiga u soo gurmaday barakacayaasha ay siiyeen, taasoo u saamaxaysay in ay hal waqti carruurteeda wax u kariso.

Waxay hadda carruurteeda u karisaa masago uga soo hartay keydkii beerteeda oo ay horay u soo qaadatay markii ay imanayeen Qoryooley.

Waa beeraleey afar darab oo ay ugu beerneyd masago ku weysay fatahaadda uu webiga ka geystay tuuladii ay ku nooleyd. Iyada, seygeeda iyo lix carruur ah oo ay dhashay waxay ka soo barakaceen tuulada Maduulow oo 15-KM galbeed kaga beegan Qoryooley.

Waxay hadda joogaan Qoryooley muddo toban maalmood. Gurigii ay ka deganaayeen tuulada Maduulow iyo beertoodii ayey sheegtay ay biyo harqiyeen, kaddibna ay ka soo baxsadaan si ay noloshooda u badbaadsadaan.

“Wax iiga badbaaday malahan saddex loor oo masaga ah ayaa iga khasaartay. Biyo ayaa galay loorarkii ay ku jireen. Waxaa ii badbaaday lix suus ama koobo oo aan horay ula soo barakacay,kuwii kale biyaha ayey ku dhex-jireen, waana qaadi weynay. Waxaan ka soo tagnay beertii oo ay biyo dhex-jiifaan kullo” ayay titi Faadumo.

Guddoomiyaha degmada Qoryooley, Siid Cali Ibraahin Xasan ayaa sheegay in maamulkiisu uu wada qorshe gargaar rasmi ah lagu gaarsiinaya barakacayaashan, iyagoo kaashanaya dowladda Soomaaliya. Waxaa uu xusay inta ka horeysa helitaanka gargaarkaas ay ku dadaalayaan in ay kala shaqeeyaan xubnaha guddiga in dadka magaalada laga sooi ururiyo raashin

“Xaaladooda aad bay u adag tahay, waa dad soo barakacay, oo guryahoodii, beerahoodii biyuhu qaadeen. Maalmihii dambe waxaan ku mashquulsaneyn sidii dadka Qoryooley ku soo barakacay loo gargaari lahaa oo dowladda xitaa waan gaarsiinay. Waxaan rajeyneynaa in gargaar noo yimaado” ayuu yiri Siid Cali.

Sahro Nuur Axmed, iyada iyo saddex carruur ah oo ay dhashay oo ay sanad ka hor kala tageen aabahood waxay Qoryooley yimaadeen saddexdii bishan. Waxay ka soo barakacday tuulada Maduulow, kaddib markii  dhul beereed ay laheyd oo dhan hal hektar iyo bar ay biyuhu qaadaan.

Sahro Nuur waxay fatahaaddu ka baabi’isay dhammaan dalagyadii ay beeratay oo isugu jira masago, digir, galley iyo khudaar. Waxaa ay sheegtay in nolol wanaagsan ay ku heystay tuuladeeda oo ay iyada iyo carruurteedaba heli jireen masruufkooda maalin’laha ah.

“Markaan tuuladeeyda joogay waxaan ahaa qof shaqeysta ,waxaan ka shaqeyn jiray beerteyda. Dalag baa iigu beernaa, waxaan rajeynayey in ay waqti dhow ii soo go’i laheyd beerta oo aan suuqa u iibgeyn lahaa si aan carruurteyda iyo dadkeyga ugu anfaca. Dhammaan rajadaas way dhammaata. Anaa ka shaqeysan jiray beerteyda oo waxay eheyd meesha keliya ee nolosheena ku tiirsaneyd”, ayay tiri Sahro.

Sahro ayaa sheegtay in haatan qoyskooda ay cunaan 10 kilo oo raashin bariis iyo sokor ah, oo ay ka heshay guddiga u soo gurmaday dadka soo barakacay.  Waxaa ay ka walwalsan tahay waxa ay carruurteeda sii doonto iyo haddii ay heli doonto gargaar kale maadaamaa raashinka ay hadda heysata uu ka dhamaanaya oo ay uga harsan tahay 2 kiilo.

Fatahaad saameysay qoysaskan iyo barakaca ka dhashayba, waxay imaneysaa iyadoo toddobaadyadii u dambeysay ay soo baxayeen digniinno ay soo saareen hay’adaha samafalka oo ku aaddan khatarka in webiyada dalka ay fatahaad sameyn karaan. Dadka ku nool goobaha webiyadu maraan ayaa lagu boorriyey in ay naftooda iyo hantidooda badbaadsadaan haddii ay dhacdo fatahaad.

Post your comments

LEAVE A REPLY

Please enter your comment!
Please enter your name here