Roob ka da’ay Doolow oo aqallada ka dumiyay boqollaal qoys oo soo barakacay

0
136
Photo|Keydka Ergo

(ERGO) – Daad uu soo rogay roob xooggan oo saddexdii ilaa afartii Abriil ka da’ay degmada Doolow ee gobolka Gedo ayaa sababay inay hoy-la’aan ku dhacdo 350 qoys oo ka soo barakacay abaaraha. Cali Ibraahim Maxamed oo ah guddoomiye ku-xigeenka guddiga xerada Kambaasa II oo ay dadkan deggenaayeen ayaa sheegay in dadka ay markii hore guryo ka dhisteen dooxooyin ay maraan biyaha ka soo rogmada duleedyada ee ku darsama webiga Jubba.

Guddiga xerada ayaa qoysaskaas isugu geeyay mid ka mid ah saddex hool oo ay sanadkii hore hay’aduhu ka dhiseen xerada, kaas oo loogu talagalay dadka cusub ee abaaraha ka soo barakacaya inay sii degaan inta ay aqallo ka dhisanayaan, mararka qaarna loo adeegsan jiray in lagu bixiyo adeegyada caafimaad.

Cali Ibraahim ayaa Raadiyo Ergo u sheegay in qoysaska ay aqallada ka dumeen ay yimaadeen xilli abaar ah oo aanay cidina roob ka fikireyn. Haddana ay hoolka sii deggenaan doonaan maaddaama aanay jirin meel kale oo la dejiyo. Xilliga gu’ga waa billow, waxaana suuragal ah in roobabka ay sii da’aan ilaa bisha Juun ee soo socota.

Maxamuud Aadan Keerow oo 55 jir ah ayaa ka mid ha dadka uu roobka aqallada ka dumiyay. Ninkan oo ah aabbaha afar carruur ah ayaa Raadiyo Ergo u sheegay in daadka uu la tagay wax kasta oo agab ah oo aqalka u yaallay, sida maacuun, dhar iyo raashin isugu jiray galley uu hal kiilo ku qiyaasay iyo digir aan badneyn.

“Waxaan hal mar aragnay daad xawli ah oo noo soo galay,” ayuu yiri. Xilli seq-dhexe ah ayay ahayd markii uu carruurta oo keliya ka badbaadsaday daadkaas. Wuxuu hadda ka mid yahay dadka isdhex-daadsan ee ku hoyanaya hoolka la dejiyay oo ah jiingad dusha ka dadan.

Maxamuud oo ahaa xoolo-dhaqato-beeraley ay abaarta saameysay ayaa xeradan soo degay bishii Luulyo ee sanadkii hore, markaas oo uu gaari-dameer qoyskiisa uga soo raray miyiga degmada Waajid ee gobolka Bakool. Wuxuu aqalka ka dhistay meesha keliya ee bannaaneyd ee ay xerada ka heli kareen.

Dadku ma haystaan gogol ay iyaga iyo carruurtooda ku seexdaan iyo wax ay ka huwadaan dhaxanta sida ay sheegtay Aamino Maxamed Deeqow oo haysata afar carruur ah oo agoon ah. Waxay dhinac ka seexataa hoolka tan iyo markii uu daadku dumiyay aqalkooda oo ka sameysnaa ulo, baakado iyo maryo.

“Meeshii weli biyo ayaa jiifa oo dib looguma noqon karo. Hoy kale ma aqaan sidaan ku helayo,” ayay tiri. Waxay bartamihii sanadkii hore ka soo barakacday deegaanka Ufurow ee gobolka Bay, kaddib markii ay abaarta ka dishay 32 lo’ ahaa oo ay noloshooda ku tiirsaneyd.

Daadku ma saameyn qoysaska soo barakacay ee deggan dhulka taagga ah. Xeradan oo ay ku nool yihiin dad lagu sheegay 4,500 oo qoys wax gargaar ah lagama bixin muddo sanad ah, waxayna noloshooda ku tiirsan tahay shaqooyin yaryar. Haweenku waxay dharka u soo dhaqaan qoysaska magaalada, halka ay ragguna u xamaali tagaan suuqyada. Waxay Doolow oo u jirtaa 3 km.

Post your comments

LEAVE A REPLY

Please enter your comment!
Please enter your name here