Beeraley soo barakaday oo abuur lagu caawiyay si ay gu’ga uga faa’ideystaan

0
144
Cabdullaahi Maxamed oo ka mid ah beeraleyda abuurka la siiyay oo ka safraya xerada Iidaale ee Baydhabo/Muxyadiin Xusni/Ergo

(ERGO) – Toddobo kun oo qoys oo ah beeraleyda ay abaarta saameysay ee ku nool xeryaha lagu barakacay ee magaalooyinka maamulka Koonfur-galbeed ayaa tan iyo bishii Feberaayo loo qeybiyay abuur. Qorshuhu waa in ay deegaannadooda dib ugu noqdaan, kana faa’ideystaan xilli-roobaadka gu’ga oo la rajeynayo toddobaadyada soo aaddan. Ilaa hadda 100 qoys oo dadkaas ka tirsan ayaa deegaannadooda dib ugu noqday si ay diyaarinta beerahooda uga sii shaqeeyaan.

Kaarar lacag ku jirto ayaa sidoo kale loo qeybiyay qoysaska abuurka la siiyay. Waxaa loogu talagalay in saddexda bil ee soo socota ay hal mar middiiba $69 raashin ahaan ama lacag ahaan uga qaataan dukaano cayiman oo ku yaalla magaalooyinka waaweyn.

Beeraleyda qaar qoysaskooda waxay uga tagi doonaan xeryaha maaddaama aysan hubin in roob fiican uu deegaannadooda ka da’ayo. Waalidka iyo carruurta ugu waaweyn qaar ayaa beeraha aadi doona si haddii ay wax-soo-saar yeelato ay u guuraan, haddii kalena ay xeryaha ugu sii negaadaan.

Qoyska Muumino Cabdullaahi Cabdi oo toddobo cisho ka hor ku noqday tuulada Misgaale oo 18 km koonfur ka xigta Baydhabo ayaa ka mid ah beeraleyda isu diyaarinaya ka faa’ideysiga roobka iyo abuurka la siiyay. Waxay Raadiyo Ergo u sheegtay in ay sii billaabeen ka shaqeynta beertooda oo lix hektar ah.

Waxay gaari-dameer iyo bajaaj uga guureen kaamka Towfiiq ee duleedka Baydhabo oo ay deggenaayeen sanad iyo siddeed bil. Waxaa safarkooda uga baxday Sosh150,000 ($6.5) oo ay kaarka kala baxeen horraantii bishan. Waa markii ugu horreysay oo ay beer tacbadaan muddo saddex sano ah oo ay deegaankooda abaar ka jirtay.

Kaarka dukaamo gaar ah oo ay hay’adda iyo wasaaradda ay la macaamilaan oo magaalooyinka waaweyn. Marka ay bisha ay dhamaato ayay qaataan. Maarso billowgeedii ayay dadka qaar lacag ahaan u qaateen, qaarna raashin.

Boqollaal qoys oo xeryaha ku sugan ayaa isu diyaarinaya dib-u-noqoshada. Weriyaha Ergo ee Baydhabo ayaa 27-kii Maarso la kulmay Cabdullaahi Maxamed Aadan xilli uu u xirxirnaa ku noqoshada deegaankiisa Mukuudo oo 23 km u jira. Isaga iyo wiilkiisa ayaa maalintaas baxayay, waxayna xerada Iidaale uga tagayeen lix carruur ah iyo hooyadood.

Wuxuu sheegay in uu jeclaan lahaa qoyska oo dhan inuu raro maaddaama nolosha barakaca ay dhib badan tahay, laakiin aanay hadda taasi suuragal ahayn inta uu ka hubsanayo inay beerta soo go’do. Wuxuu rajo ka muujinayaa haddii ay beeraha u baxaan inay noloshooda isbeddeli doonto qoyska oo dhanna uu celin doono.

Cabdullaahi oo barakac ku ahaa Baydhabo muddo sanad iyo bar ah ayaa ku faraxsan in abuurka la siiyay uu u rumeeyay riyadii uu ka lahaa inuu mar un dib ugu noqdo shaqadiisii beero falashada. Waxba ma uusan tacban muddo saddex sano ah.

Agaasimaha guud ee Wasaaradda Beeraha Koonfur-galbeed, Cabdi Siraaji ayaa Raadiyo Ergo u sheegay in abuurka ay beeraleyda siiyeen uu isugu jiro masaggo, galley, digir, sisin iyo nooco kala duwan oo khudaar ah. Mashruucan oo muhiimaddiisu ay tahay in uu gacan ka gaysto sidii ay dadkan dib ugu noqon lahaayeen noloshoodii hore ayuu xusay inay ka caawinayso hay’adda Cunnada iyo Beeraha ee FAO.

Waxaa la hiigsanayaa sida uu agaasimaha sheegay in abuurka la gaarsiiyo 15,000 oo qoysas soo barakacay ah si ay gu’gan uga faa’ideystaan. Xilli-roobaadkan oo la rajeynayo inta u dhaxeysa Maarso ilaa Juun waa mid wax-soo-saar badan leh oo dalagyo badan ay ka soo go’aan meelo badan oo Soomaaliya ah.

Sida uu bartamihii bishii hore sheegay Mashruuca Maamulka Dhulka iyo Biyaha Soomaaliya ee SWALIM, gu’ga sanadkan 2018 waxaa la rajeynayaa inta badan gobollada dalka inuu ka hoos-maro qiyaasta caadiga ah. Inta badan deegaannada gobolka Bay lagama filayo roob badan.

Post your comments

LEAVE A REPLY

Please enter your comment!
Please enter your name here