Home Wararkii u Danbeeyay Boqollaal arday oo ku waxbarasho beelay colaad u dhexaysa laba beelood

Boqollaal arday oo ku waxbarasho beelay colaad u dhexaysa laba beelood

0
158

Ku dhowaad 650 arday oo 227 ay gabdho yihiin ayaa waxbarasho la’aan ku ah deeggaanka Darar-weyne oo qiyaastii 125 km Koonfur-galbeed uga beegan magaalada Ceergaabo ee xarunta gobolka Sanaag. Hal dugsi sare iyo lix iskuul oo hoose-dhexe ah ayaa xirmay kaddib muddo ka badan laba bilood  oo halkaas ay ka taagntahay colaad u dhexaysa laba beelood.

Ardayda qaar ayaa hadda xoolo-raacato u ah qoysaskooda oo awoodi waayay inay deegaanka ka barakacaan arrimo dhaqaale dartood.

Qoysaska ay ardaydan ka soo jeedaan oo deggenaa tuulooyinka Garab-cad, Xamilka, Beerwaafo, Siigodheer iyo Dhaba-mamac  ayaa u barakay dhulka miyiga ah oo ka fog meelaha lagu dagaalamay iyo xeryo dadka abaarta ku cayroobay ay deggan yihiin oo koonfur uga beegan Darar-weyne. Qaar kale ayaa u barakacay magaalooyinka Ceergaabo iyo Ceelafweyn.

Ibraahim Axmed Yuusuf oo 25 jir ah, wuxuu ahaa arday dhigta fasalka koowaad ee dugsiga sare ee Darar-weyne, hadda wuxuu 20 ari ah oo ka haray 150 neef oo qoyskiisu dhaqan jireen abaarta ka hor ku raacaa baadiyaha Darar-weyne oo uu ehelkiisa ula barakacay. Qoyskiisa oo noloshoodu ku tiirsan tahay xoolaha uu maalin walba raaco, ayaan awoodin in Ibraahim ay meel kale waxbarasho ugu diraan.

Afar gabdhood iyo saddex wiil oo la dhalatay Ibraahim isla markaana dhigan jiray dugsiga hoose/dhexe ayaa hadda guriga jooga iyaga oo  waxbarasho  la’aan ah. Waalidkood ayaa ka walaacsan saamaynta ay colaadu ku yeelatay ubadkooda oo hadda wajahaya mustaqbal madow.

Isu-duwaha waxbarashada ee tuulada Darar-weyne Faarax Aadan Xirsi ayaa Raadiyo Ergo u sheegay in iskuulkii carruurtu dhigan jireen ay hadda degan yihiin ciidanka Somaliland ee ku kala dhex jira labada beel ee dirirtu u dhexayso. Ciidanka oo deegaanka yimi dhammaadkii 2017 kii ayaa degay iskuulka. Agaasimaha ayaa sheegay in agabkii dhex yaallay iskuulada ay burbureen oo haddii colaado istaagto loo baahnaan doono in dib loo iibiyo buugaagtii iyo koraastiiba.

Tuulada Darar-weyne ee laga barkacay ayaa waxaa ku haray 350 qof oo dumar iyo carruur isugu jira. Qoysaskan ayay noloshoodu ku tiirsan tahay xoolaha nool.

Aamina Yuusuf Maxamed oo ka mid ah qoysaska wali ku haray Darar-weyne, siddeed carruur ah oo ay dhashay ayaa lix ka mid ah u dhigan jireen iskuulka. Wiil ka mid ah carruurteeda oo ay u dirtay magaalada Burco colaada kaddib ayaa hadda dhigta dugsiga sare ee Shiikh Ibraahim. Colaadii kahor ayuu dhigan jiray fasalka labaad ee dugsiga sare ee Darar-weyne.

Waxay sheegtay in carruurta intii kale ay hadda kula noolyihiin tuulada. Mana jirto waxbarasho ay ku haystaan. Aabohood oo fuundinimo uga shaqaysta degmada Ceel-afwayn oo 60 km u jirta Darar-weyne ayay noloshoodu ku tiirsan tahay.

Colaada ayaan ku koobnayn ardayda oo keliya, waxayna sidoo kale saamayn ku yeelatay macallimiintii iskuullada deegaanka.  19 macallin oo wax ka dhigi jiray shanta iskuul ee ku yaallay deegaanka Darar-weyne ayaa hadda camal la’aan ah. Qoyaskoodii ayayna ula barakaceen meelo ka baxsan halka ay colaadu ka jirto.

Post your comments

LEAVE A REPLY

Please enter your comment!
Please enter your name here