Carruur laga keenay tuulooyinka oo nafaqo-darro loo seexiyay isbitaalka Kismaayo

0
192
Mothers take their Malnourished children to Kismayo hospital/Ahmed Abdi/Ergo

Carruur ay tiradooda gaarayso 188 oo nafaqo-darro la ildaran ayaa labadii toddobaad ee u dambeeyay jiifa isbitaalka magaalada Kismaayo. Carruurtan oo ay da’dooda ka yar tahay shan sano ayaa laga keenay tuulooyin ka tirsan Jubbooyinka oo ay ka jirto cunto-yari ka dhalatay abaarta. Waa deegaanno aan lahayn xarumo caafimaad, sidoo kalena aanu gaarin gargaarka hay’adaha iyo maamulka Jubbaland sababo ammaanka la xiriira awgood.

Madaxa qeybta nafaqeynta ee isbitaalka Kismaayo, Maxamed Cismaan Geeddi oo aan ka soo xigannay tirada carruurta ayaa noo sheegay in bukaannada jiifa ay ku jiraan 35 carruur ah oo ay hayso nafaqo-darro uu heerkeedu liito iyo 53 kale oo nafaqo-darrada ay u weheliyaan xanuunno kale sida shuban. Kuwaas lagama maarmaan ayay u tahay in isbitaalka la seexiyo. Laakiin waxaa tirada badinaya carruurta laga keenayo tuulooyinka ee aan ehelladoodu deggeneyn magaalada.

Maxamed oo sidoo kale ah dhaqtar ku takhasusay nafaqeynta ayaa sheegay in inta badan bukaannada uu isbtaalku u yahay meesha keliya ee ay hoy iyo cunto ka heli karaan, inta looga celinayo tuulooyinkooda.

Faadumo Cabdiraxiim Nuur waxay muddo toddobaad ah isbitaalka kula jirta wiilkeeda oo 15 bilood jira. Waxay sheegtay muddadaas in la siiyay caano nafaqaysan, irbado iyo sharoobooyin, maadaama shuban iyo matag ay u weheliyeen nafaqo-darrada.

Horraantii bishan ayay wiilkeeda ku aragtay xanuun iyo barar ka muuqday jirkiisa oo dhan. Muddadaas waxay ku haysay deegaanka Mugaanbow oo 90 km u jira Kismaayo, waxayna la’ayd cid ka caawisa helista daryeel caafimaad. Marka ay qandho qabato maro intey u qoyso ayay madaxa ka saari jirtay, si ay qandhadu uga yaraato.

Laakiin toddobaad ka hor qof ay qaraabo yihiin oo jooga Kismaayo ayaa taleefoonka ugu diray $6.5 oo u dhiganta Shso150,000 oo ay ku gaysay isbitaalka. “Maanta wuu fiican yahay. Wuu faraxsan yahay oo wuu ciyaarayaa,” ayay tiri. Waxay ka mid tahay dadka aanay magaalada ehelka u joogin, sidaas darteed inta uu si buuxda uga soo kabanayo wiilkeeda waxay ku hayn doontaa isbitaalka.

Qoyska Faadumo waa beeralley. Dhul toddobo hiktar ah ayay abaarta ka hor ku tacban jireen sisiin, galley, qare iyo digir. Laakiin muddo sanad iyo bar ah ma aysan helin roobka oo ah waraabka keliya ee ay ku tiirsanaayeen, sidaas daraadeed waxba uma soo go’in.

Hooyooyinka qaar waxay ka walaacsan yihiin waxa ay carruurtooda siin doonaan marka ay isbitaalka ka saaraan oo ay dib ugu celiyaan guryahooda tuulooyinka. Xabiibo Cabdirashiid oo hooyooyinkaas ka mid ah oo loo baxnaaninayo wiilkeeda oo 11 bilood jira. Waa hooyada qoys xoolo-dhaqato ah oo ka timid deegaanka Cabdi-Dhoorre oo 55 km u jira Kismaayo.

“Waxba igama horreeyaan, laakiin dantu waxay igu khasbeysaa inaan ku noqdo maaddaama ay carruurteyda jiraan,” ayay tiri. Toddobo carruur ah oo kale oo ay deegaanka uga timid waxaa haya aabbahood.

Abaarta waxaa uga dhintay 97 ari ah. Waxaa u soo haray oo ay hadda haystaan 18 neef oo keliya.

Deegaannada ay nafaqo-darrada ka jirto waxaa ka mid ah; Mugaanbow, Cabdi-dhoorre, Cabdalla-Biroole, Buulo-Xaaji, Jilib, Jammaame, Kamsuumo, Yoontoy iyo deegaanno kale oo ka tirsan labada Jubbo. Dadka ku nool waxay isugu jiraan beeraley iyo xoolo-dhaqato, qaarkoodna labo sano ka badan roob fiican kama di’in.

Post your comments

LEAVE A REPLY

Please enter your comment!
Please enter your name here