Abaarta oo saameysay dadkii ay noloshooda ku tiirsaneyd meydiga

0
92
Fadumo Mohamed (centre) and two other women sifting frankincense for export/Abdirahman Abdi Mohamed/Ergo

(ERGO) – Faadumo Maxamed oo ah hooyo 37 jir ah oo keligeed carruur korsata ayaa ka fikireysa in ay dib ugu noqoto xero lagu barakacay oo ku taalla magaalada Boosaaso, taas oo sagaal ka hor ay ka soo guurtay. Bakhaarrada dhoofiya dhirta udugga laga sameeyo ee meydiga loo yaqaanno ayay ka shaqeynaysay, waxaana sanadkii tegay wax-soo-saarkii ay howshaas ku tiirsaneyd hoos u dhigtay abaarta. Waxaa lagu leeyahay kirada gurigii ay deggeneyd oo afar bil iyo raashinkii ay muddadaas deynsatay oo dhan $300.

Haweenka ayaa kala gura, haadiya, kala finjila, kaddibna jawaanno ku cabbeeya meydiga xilliga ay bakhaarrada u diyaarinayaan dhoofka. Laakiin Faadumo oo haysata toddobo carruur ah oo ay aabbahood kala tageen ayaa Raadiyo Ergo u sheegtay in marmar dhif ah ay toban haween ah ku diyaariyaan hal jawaan oo xabag ah. Waa shaqo ay abaarta ka hor ku qaban jireen labo qof oo keliya. Halkii jawaan waxaa lagu bixiyaa SoSh180,000 ($6.4). Sanadkii hore waxay inta badan gurigeeda dib ugu noqoneysay iyadoo aan shaqo helin, taas oo ku khasabtay inay deyn ku noolaato.

Maxamed Samatar Yuusuf oo madax ka ah dallad ay ku mideysan yihiin ganacsatada meydiga ee gobolka Bari ayaa Raadiyo Ergo u sheegay in shaqo-yarida ay saameysay boqollaal haween ah oo ka shaqeyn jiray bakhaarradii xabagta lagu keydin jiray oo gaaraya 23. Saddex ka tirsan bakhaarradaas oo keliya ayay hadda waxyar oo xabag ah yaallaan, inta kalena way maran yihiin.

Wuxuu intaa ku daray saddexdii sano ee u dambeysay oo abaarta ay si daran u saameysay gobolka Bari ay sii yaraaneysay xabagta meydiga ee la dhoofiyo. Dhirtan oo dib loo warshadeeyo si looga sameeyo waxyaabaha udugga ah ayaa loo iibgeeya dalalka Jabuuti, Masar, Sacuudiga, Cumaan iyo Isu-tagga Imaaraadka Carabta. Keliya xoolaha ayaa ka horreeya marka la fiiriyo waxyaabaha dibadda loo dhoofiyo ee laga helo gobolkan.

Maxamed ayaa sheegay in 110 ganacsade oo dalladdooda ku mideysan ay sanadkii hore ka heleen xabagta ay dhoofiyeen $100,000 oo keliya, halka abaarta ka hor ay sanadkii ka heli jireen doollar gaaraya nus milyan, markaas oo dibadda u suuqgeyn jireen sanadkiiba afar kun ilaa lix kun oo tan.

Meydigu wuxuu u kala baxaa noocyo kala duwan sida shooto iyo sifaayad la dhoofiyo, iyo foox iyo qolof suuqyada gudaha lagu gado oo ay dadku guryaha ku shitaan.

Dadkii lahaa beeraha ay ku yaallaan geedaha meydiga ayuu sidoo kale hoos-u-dhacay dhaqaalihii soo geli jiray. Ducaale Xaaji Yuusuf oo dadkaas ka mid ah wuxuu sanadkii 400 oo geed oo u abuuran ka goyn jiray 1,000 kiilo oo xabag kala duwan ah, laakiin sanadkii la soo dhaafay wuxuu ka helay 2,500 oo kiilo.

Wuxuu noo sheegay in saddex bilood oo sanadka ka mid ah uu xabag ka diiran jiray geedaha. Geedka marka la diiro wuxuu dhalaa dheecaan muddo kaddib isu beddela xabag, laakiin qalleyl ka dhashay roob-la’aan ayaa taas meesha ka saartay. Ducaale oo abaarta ka hor sanad kasta ku tashan jiray $7,000 wuxuu sanadkii la soo dhaafay xabagta ka helay $2,000 oo keliya.

Ninkan oo qoyskiisa uu ka kooban yahay 16 qof ayaa hadda waxbarashada iyo adeegyada kale ee nolosha qoyskiisa u kaashada dhaqaale uu horay u keydsaday.

Post your comments

LEAVE A REPLY

Please enter your comment!
Please enter your name here