Beledweyne Daad barakiciyay 400 oo qoys

0
68

Ugu yaraan afar boqol oo qoys ayaa guryahooda uga barakacay daad ka dhashay roob mahiigaan ah oo Beledweyn ka da’ay habeenkii khamiista. Roobka oo socday sideed saac ah oo xariir ah ayaa daad ku rogay saddex xaafadood oo kala ah Kooshin, Xaawo Taako iyo Horseed oo dhanka berri ee magaalada ku yaal.

Daadka oo kasoo rogmaday dhulka buuraleyda ah ee magaalo madaxda gobolka Hiiraan ku wareegsan ayaa guryaha ugu galaday dadka oo jiifa oo aan ku baraarugsaneyn, sida uu sheegay Maxamed Xasan Axmed oo ka mid ah dadka xaafada Kooshin.

“Carruur iyo alaab bay biyahu qaadeen, laakiin waxaan ku guuleysannay in aan dadka kasoo badbaadino,” ayuu yiri Maxamed. Maxamed iyo qoyskiisa oo ka kooban sideed qof waxa ay ka mid yihiin 190 qoys ayaa ka barakacday xaafadaas oo ka mid ah meelaha sida daran ay u saameeyeen daadadka.  Waxa ay dageen dhul banaan oo ku yaal deegaanka Ceel-jaale oo ah dhul sare oo duleedka magaalada ku yaal.

Labo boqol iyo toban qoys oo kale ayaa iyana ka barakacay xaafadaha Xaawo Taako iyo Horseed, sida ay sheegeen saraakiil ka tirsan maamulka degmada Beledweyn. Dadkaas waxa ay ku barakaceen gudaha magaalada, iyaga oo dulsaan ku ah eheladooda degan xaafadaha kale ee magaalada. Dadkaas waxaa ka mid ah Macalim Maxamuud Xasan Cabdille oo ka barakacay xaafada Xaawo Taako.  “Dadku ma helin dib u dajin. Qaar duleedka magaalada ayey u barakiceen, kuwo kale oo aan ka mid nahay waxa ay la nool yihiin eheladooda oo iyaguba aan heysan nolo wanaagsan,” ayuu yiti Maxamuud.

Si kastaba, weriyaha Raadiyoow Ergo ee Beledweyn ayaa sheegaya in saddexdaas xaafadood ee ay biyahu kusoo rogmadeen ay ku dhow yihiin togag iyo biyo-mareenno daadadka kasoo rogmada buuraha magaalada ku hareereysan ku dara webiga.  Dhulkaas oo aan loogu talo-gelin in la deegaameeyo ayey dadku guryo ka dhisteen dhowr iyo labaatankii sanno ee dowlad la’aanta. Sidaas darteed, daad ayaa kusoo rogmada xaafadaha Kooshin, Xaawo iyo Horseed marwalbo oo uu roob xoogan da’o.  labo iyo toban qof oo isugu jira carruur iyo dad waayeel ah ayaa ku dhintay daad kusoo rogmaday xaafadaas oo ka dhashay roobkii guga ee horraantii sanadkan.

Dhanka kale, daad ka dhashay roob labaatan saac ka da’ayay tuulo la yiraa Malmal-kuus oo dhanka Waqooyi bari ka beegan degmada Saakow ee gobolka Jubada Dhexe ayaa qaaday afar carruur ah. Carruurtaas ayey da’doodu u dhaxeysaa labo ilaa lix sanadood. Roobka oo da’ay  axadii iyo isniinta ayaa la tagay labo ka mid ah carruurta oo lix sanno jiryaal ah oo ari la jooga tuulada Malmal-kuus. Labada kale ayey biyuhu ka qaadeen aqalkooda, sida ay sheegtay Batuulo Aaden oo ka mid ah ehelada carruurta ay daadadku la tageen.

Weriyaha Raadiyoow Ergo ee gobolada Jubooyinka oo telfoon kula xariiray dadka deegaanka ayaa sheegay in daadku uu sidoo kale la tagay tiro ari ah islamarkaasna dumiyay guryo dhowr ah oo ku yeel tuulada Malmal-kuus. Roobabka xoogan ayaa la maleynayaa inay bilow u yihiin roobka dabeysha wata ee Elnilo la yiraa oo laga cabsi qabo in uu ku dhufto Soomaaliya saddexda bilood ee deyrta. Dadka ayaa looga digayaa inay ka fogaan dhulka webiyaha iyo buuraleyda ku dhow si aysan waxyeelo uga soo gaarin daad iyo fatahaado kusoo rogmada.

Post your comments

LEAVE A REPLY

Please enter your comment!
Please enter your name here