Qoysas xoolihi kaga le’deen abaaraha oo gaaray Balanbale

0
95
Photo | Sawir/kaydka/Ergo

Guddoomiye ku xigeenka degmada Balan-balle ee gobolka Galgduud Maxamuud Maxamed Cabdi ayaa sheegay in 50 qoys oo xoolihii ay kaga dhammaadeen abaaraha ay soo gaareen degmada kuwaasoo u baahan gargaar bani’aadamnimo.

Qoysaskan ayaa ka soo barakacay tuulooyin dhowr ah oo hoos yimaada Balan-balle oo kala ah Axmed Gurey, Jiicle, Isgoyska, Fadhi garaadle iyo Qaydarlafool, dadkani waxay ahaayeen xoolo dhaqato biyaha ka cabi jiray tuulooyinkaas la magacaabay oo hadda aan lahayn biyo iyo baad toona.

Qoysaskan ayaa hoy ahaan u deggan geedo hoostood, dadka deegaanka ayaa gaarsiiyey xoogaa kaalmo oo ay iska soo ururiyeen una badan  raashin oo aan dabooli karin baahida iyo duruufta nololeed ee ka muuqata, waayo dadka degmada jooga ayaa sidoo kale saamayn ay ku yeelatay abaaraha maaddaama ay ku tiirsanaayeen ganacsiga xoolaha oo aan waqtigan suuq lahayn caato awgeed, marka wax yar bay dhaamaan dadka reer guuraaga ah ee xooluhu ay kaga le’anayaan, kuwaasoo miciin bidaya inay u hayaan dhanka magaalooyinka si ay u heelaan biyo cunto sidaa waxaa Ergo u sheegay Maxamuud Maxamed Cabdi.

Wuxuu intaa raaciyey in ceelashii ay biyaha ka cabi jireen qaarkood ay jabeen baraagihiina biyo aysan ku jirin rob la’aanta awgeed, xoolihiina ay dhammaadeen sidaa darteed waa dad dhibaato hasyta, waxaana hay’adaha samafalka u diraynaa codsi ah in dadkan loo gurmado haddii kale waxaa dhici doonta in kumannaan qoys ay soo galaan magaalooyinka ama xaaladdu sii xumaato.

Soomaaliya oo xilligani ay ka jirto abaar aad u kulul oo dadka iyo duunyada saamaysay waxaa gaajo iyo harraad u dhintay dad badan waxaana ku le’day xoolo aad u tiro badan waxaa wehliya cudurro ka dhashay abaraaha, barakaca, oonka iyo gaajada.

maxamud cabdi diirshe/FO

Post your comments

LEAVE A REPLY

Please enter your comment!
Please enter your name here