BEERALAYDA BOOCAME OO CAYAYAAN KA CABANAYA

0
30

Beeralayda deegaanka Boocame ee gobolka Sool ayaa sheegaya in wax soo saarkoodii sanadkaan hoos u dhacay, tanoo ay keentay cudduro iyo cayayaan fara ba’an ku haya dalagyada ay ganacsiga u beertaan.

Beeralayda waxay sheegeen in sanadkii la soo dhaafay waxyaalihii la beertay oo dhan ay sameeyeen cudurado, siiba khudaartu ay ugu horayso yaanyadu.

Maxamuud Xirsi Faarax oo ah wakiilka sawaarada beeraha iyo deegaanka Puntland ee degmada Boocame ayaa Ergo u sheegay “Ilaa afar xanuun baa halkan ka jira, mid waa bahal madow oo qudaarta gelaya, midna waa malibiso, midna wuxuu ka dhashaa nafada dhulka oo xumaata, balse anagu ma naqaan xanuunka yaan-yada ku dhacay.”

Faysal daahir Jaamac oo ka mid ah beeralayda Boocame ayaa sheegay isna in beertiisa oo ka kooban saddex hikter, aysan dhowr xilli ku khasaareen wax soo saarkoodii ugu muhiimsanaa ee suuqyada waa wayn ay u iib geyn jireen.

“Khudaarta cagaaran baa ugu badan waxa noo soo go’a, sida saladhka, basasha, bar-barooniga, basbaaska iyo koostada, sidoo kale geed midhoodka ayaa isna noo baxa. Daawada aan haysanaa waxba ka tari wayday xanuunka ku dhacay yaanyada”

Axmed Cabdiraxmaan Cabdulaahi oo ka mid ah beeralayda ayaa isna Ergo u sheegay inaysan garanayn xanuunka ku dhacay dallagooda, gaar ahaan yaan-yada, mana helin taakulayn iyo aqoon dheeraad oo ay ka faa’iidaystaan, si ay uga hortagaan khatarta wax soo saarkooda.

Wasaaradda beeraha iyo waraabka Puntland ayaa xaqiijisay in ay  jirto halista tacbashada yaan-yada ee deegaanka Boocame, isla markaasna ay u dadaalayaan sidii loo badbaadin lahaa, Maxamuud Xirsi Faarax oo ah wakiilka beeraha iyo deegaanka ee degmada ayaa sidaas sheegay.

“Daawadii dili lahayd cayayaankan iyo farsamadii loo adeegsan lahaa waxaan doonaynaa in gacan laga siiyo beeralayda, dadku si uu wax soo saarkoodu u sii kobco,  beeralayda dhinaca aqoonta laga dhiso iyana waa dadaal muhiim ah oo wasaaradu hadda qorshaynayso.”

Deegaanka Boocame waxaa ku yaal in ka badan 100 beerood oo waa wayn, oo si wanaagsan u loogu tabco, deegaanka oo leh biyo wanaagsan ayaana u fududeeyey in in beeralaydu sanadkii xili kasta wax beeraan, iyagoo adeegsanaya makiinadaha waraabka, waxayna laf dhabar u yihiin khudaarta la geeyo magaalooyinka Laascaanood iyo Garoowe.

Cabdiraxmaan Maxamed Xaaji

Post your comments

LEAVE A REPLY

Please enter your comment!
Please enter your name here