XAALADDA BEERALLEYDA ROOBKA EE BAYDHABO OO XILLIGAN GOOSANAYA DALAGGII DAYRTA

0
37
Maalmahan beeralleyda gobolka Bay waxay ku mashquulsan yihiin goosashada dalagga kala duwan oo ay sugayeen in ay xilli sanadeedkan ay helaan, waxaana dalagyada ay beerteen ka mid ahaa haruurka galleyda iyo meseggada oo u badnaa wax yaabaha ay beerteen.
Aniga iyo koox beeralley ah islamarkaana isku diyaariyey maalmo ka hor markii ay ogaadeen  in la gaarey waqitigii ay goosan lahaayeen dalagga kasoo go`a beerahooda sida meseggada, galleyda iyo digirta ayaa aroor hore inta aysan soo iftiimin qorraxda waxaan ka anba-baxney magaalada Baydhabo waxaana ku wajneyn dhanka beeraha ku yaalla koonfurta magaalada, waxaana indhaheyga ay qabanayeen intii aan waddada ku socdey beeralley badan oo ku mashquulsan goosashada haruurka.
Maamo Aamino Nuur Calasow waa hooyo 60 sano jir ah, waxay milkiyad u leedahay beer dhulka ay ku taallo aad u baaxad weyn tahay, Ergo ayey  u sheegtey iyadoo dhabarka u uu saaran yahay jawaan ay ka buuxisey meseggada beerta laga gooyey in sanadkan rajada wax soo saarka beerteeda uu fiican yahay ayna ka heshey haruurka 10  jawaan, hase yeeshee waxaa ay tilmaantey in dalagga meseggada usoo go`day aysan geyn doonin suuqayada magaalad Baydhabo sidii markii hore ay sameyn jirteyba, iyadoo sababta ku sheegtey in qiimo jaban laga siiyo marka suuqa geeyaan xilli daal badan iyo waqti badan uu ka galey wax soo saarka beerta.
“Beerta dalaggii kasoo baxay waa laga gooyey, jawaanka ii saaran aad u jeeddo waxaa ku jira haruurka beerta laga gooyey, waxaana rajeynayaa iney igu filnaan doonaan waxaa aan ka helay, qiyaastii 10 jawaan oo kale ayaa iiga soo go`day, suuqa ma geynayo dalagga haruurka anaa cunayo” ayey tiri Aamino Nuur.
Maaddama Aamino Nuur oo iyadu ku faraxsan dalaggay heshay, waxaase jira kuwo kale oo iyagu sheeganaya inaysan helin wixii ay filayeen.
Beeralleydaasna waxaa ka mid ah Isniino Aadan Maxamuud, waxay dhax fadhisaa beerteeda oo ku taal meel 8Km dhanka koonfureed Baydhabo kaga beegan, waxaa ay heysataa 7 carruur ah labo ka mid ah beerta ayay la joogeen, seygeedii dhowaan ayaa lagu diley magaalada Baydhabo sida  ay Ergo u sheegtey, iyada ayaa hooyo iyo aabboba u ah haatan, waxay la fikirsaneyd xilligii aan beerta ugu tagayey saddex jawaan oo haruur ah oo sanadkan beerta uga soo go`day, waxayna u aanaysay xooggay haysatay oo aan u samaxayn hawsha adag ee beerta iyo aabbihii qoyska oo isna geeriyooday, horayna u ahaa laf dhabarta beerta, iyadoona weriyaha Ergo ee Baydhabo u sheegtay in sanadihii hore ay beerta ka heli jirtay 10 ilaa iyo 15 jawaan oo dalagga kala duwan ah, waxayna iyadoo ilmeyneysa u sheegtay Ergo hooyadaani in saddexdaan jawaan ay nolosheeda ku filan tahay muddo aad u kooban kadibna iyada iyo ilmaheedaba nolal aad u hooseysa wajahayaan markii horena nolashooda beeraha ay ku tiirsanayeen.
Ka sokow in dadkaasi ay beerhoodii ka helaan dalagyo sida  meseggo iyo galley  markii ay ka goostaan haruurka beertoodii waxaa ay ku wareejiyaan xoolaleyda si ay daaq ugu noqoto xoolahooda, iyagoo ka qaado lacago waa kan Maxamed Nuur oo aan ku wada kulanney beer dhoowr higtar ah islamarkaana lacag ku bixiyey baarta si xoolaha uu wato daaqsiin ugu noqoto muddo dhowr maalin ah.
Muxidiin Xusni/MH
Post your comments

LEAVE A REPLY

Please enter your comment!
Please enter your name here