Kismaayo: Shacabka oo khasaaraha ugu badan kasoo gaaray dagaalka

0
72
Photo | Gabadh dhaawac ah oo jiifta mid ka mid ah qolalka isbitaalka dhexe ee Kismaayo/Khadar Maxamuud Xareed

Dhibaatada iyo khasaaraha ugu badan ee dagaalkii labada maalin socday ee Kismaayo ka dhacay ayaa soo gaaray dadka rayidka ah. Hubka ay isku ridayeen maleeshiyada ku dagaallamay magaalada ayaa ku dhacay guryo dad rayid ah ku nool yihiin oo ay ku dhinteen toban qof oo rayid ah, inta saraakiisha caafimaadka ay xaqiijiyeen.

Xabiibo Xooshoow Aadan oo deggan xaafadda Dalcadda ee Kismaayo oo dhaawac ah ayaa raadiyo Ergo u sheegtay in hoobiye kusoo dhacay gurigeeda uu dilay gabar yar oo ilmaheeda ka mid ah, dhaawacna u geystay iyada iyo labo carruur ah oo kale.

Xabiibo Xooshoow waxay sheegtay in hoobiyayaal dhowr ah kusoo dhaceen xaafadda oo dhibta soo gaartay ay tahay mid ay la wadaagaan dadka ku nool Dalcadda Kismaayo.

Mid ka mid ah howlwadeennada caafimaadka ee isbitaalka Kismaayo ayaa raadiyo Ergo sheegay in isbitaalka ay jiifaan lixdan qof oo rayid oo dhammaan kusoo dhaawacmay dagaalka labadii maalin ka socday Kismaayo. Dhaawacyada ugu badan ee isbitaalka jiifa waxaa laga keenay xaafadda Dalcadda ee degmada Kismaayo ee gobolka Jubbadda Hoose.

Dhakhtarka ayaa intaa ku daray in dhawaacyada isbitaalka jiifa ay u badan yihiin dhaawacyo halis ah oo magaalada gudaheeda aan wax looga qaban karin.

Dhaawacyadaas waxaa ka mid ah gabadh yar oo xabad wiifto ah kaga dhacday foodda hore ee madaxa oo ay maskaxdana daadanayso.  Howlwadeennada caafimaadka ee isbitaalka dhexe ee Kismaayo ayaa ehellada gabadha u sheegay inaysan waxba u qaban karin, kuna taliyay in si deg deg ah loogu qaado magaalooyinka kale ee dalka ee laga heli karo adeegyo caafimaad oo hormarsan.

Howl-wadeen caafimaad oo isbitaalka ka tirsan ayaa Ergo u sheegay in isbitaalka uusan haysan qalab iyo daawo ku filan oo lagula tacaalo bukaannada kusoo dhaawacmay dagaalka magaalada ka dhacay.  Isbitaalka oo ay ka dhaamatay xitaa faashadaha lagu duubo dhaawacyada ayaa bixinaya adeega gargaarka oo deg deg ah.

Sarkaal ka tirsan isbitaalka dhexe ee magaalada wuxuu ugu baaqay hay’adaha gargaarka in lala soo gaaro gargaarka dawo oo deg deg ah.

Khadar Maxamuud Xareed/MR/FM

Post your comments

LEAVE A REPLY

Please enter your comment!
Please enter your name here