WELWELKA CUNTA LA`AANTA IYO QARAXYADA KISMAAYO

0
74

Dadka ku nool Kismaayo ayaa sheegay  inay ku adagtahay sidii ay u heli lahaayeen cunto.
Oday ku soo koobay magaciisa Xasan oo ka mid ah kuwa Kismaayo oo Ergo u warrmaya ayaa sheegay in dhaqaalaha dadka oo liita, dhaqdhaqaaqii dekedda oo aan jirin iyo dadka oo shaqo la’aani haysato ay keentay in awoodda wax iibsiga ee dadku ay yaraato. Sidoo kale badi waddooyinka gobolka soo gala ay saameeyeen colaado, isagoo intaas ku daray inay waqti qaadanayso dib u hawl gelinta dekedda Kismaayo.

Cabdinasir Seeraar oo ah afhayeenka maamulka ku meel gaarka ah ee Kismaayo ayaa Ergo u sheegay in dhaqaalaha magaladu badi uu ku tiirsanaa dhuxusha la dhoofin jiray, taasoo hadda gebi ahaanba la xanibay. Waxaa kaloo ay dadku sheegayaan inay waqtigaan magalada soo gaartay sahay daawo oo wanaagsan, isbitaalkuna hadda si hagaagsan u shaqaynayo, dhibaataduse tahay cuntada oo gabaabsi ah..

Dhinaca kale qaraxyada ayaa iyana weli ah khatar badan oo dadku ay ka muujinayaan welwel, siday sheegtay Amina Axmed oo ah hooyo haysata 3 carruur ah, waxayna sheegtay in aysan marna ku amaini karin carruurta inay banaanka uga baxaan cabsi la xiriirta miinooyin  dhulka la geliyey. Maalmihii la soo dhaafay ayaa qaraxyo is xig xigaa ka kala dhaceen guriga dawladda hoose  iyo aarkada oo ku taal bartamaha Kismaayo, qaraxyadaas oo dhacay Axaddii ayaa waxaa ku dhintay ilaa hadda inta la xaqiijiyey 2 ka tirsan ciidanka amaanka halka in ka badan 20 isugu jira ciidanka iyo dad rayid ahina ku dhaawacmeen kuwaasoo la dhigay isbitaalka guud ee degmada.

Kismaayo oo ciidamada dawladda oo ay kaabayaan kuwa Kenya qabsadeen muddo saddex bilood ka hor ayaan weli lahayn maamul rasmiya iyo hannaankii kaabayaasha dhaqaalaha oo aan weli hawl gelin.
MH/AM

Post your comments

LEAVE A REPLY

Please enter your comment!
Please enter your name here