Afar qof oo ku dhintay duqaymo muqdisho xalay ka dhacay

0
131

Inta la xaqiijiyay illaa afar ruux ayaa ku geeriyootay ku dhowaad labaatan kalana way ku dhaawacmeen, kadib markii qeybo ka mid ah magaalada Muqdisho ay ku soo dhaceen hoobiyayaal aan la aqoonnin halka laga soo tuuray.

Goobaha madaafiicdu khasaaraha kala duwan ay ka geysteen ayaa waxaa ka mid ah degmooyinka Boondheere iyo Shibis, halkaasoo madafiicdu ay ku dhacday xeryo ay ku jireen qoysas barakacayaal ah iyo guryo caadi ah.

Illaa iyo 15 madfac oo ku dhacday Xaafado ka tirsan degmooyinka Boondheere iyo Shibis ayaa sababay dhimasho iyo dhaawac soo gaaray dad rayid ah, xilli saqdii dhexe ah oo la hurdayay, abbaara labadii habeennimo ee saqdii dhexe hoobiye ku dhacay guri ku yaalla degmada Boondheere ayaa sababay dhimashada hooyo umul ku jirtay, taasoo haysatay illaa lix carruur ah sida uu idaacadda Ergo u xaqiijiyay Axmed Jeylaani oo isagu ah seygii qabay haweeneydaasi geeriyootay .

“Innagoo hurdayna ayaa hoobiye aad u xooggan ku soo dhacay aqalkii aan hurudnay hortiisa, firirkiisa waxuu ku dhacay xaaskeyga, dabadeedna sanka iyo afka ayay dhiig ka keentay halkii ayayna ku dhimatay” Ayuu yiri Axmed Jeylaani, isagoo intaasi ku daray in khasaare kale uusan soo gaarin qoyska intiisa kale oo xilligaas hal qol wada jiifay.

Madaafiic kale oo ku dhacday agagaarka safaaraddii Talyaanigu uu ku lahaa magaalada Muqdisho ayaa sababatay dhimashada illaaa laba ruux oo mid kamid ah uu ahaa nin dukaan gade ah,sidoo kale madaafiic kale ayaa khasaarooyin isugu jira dhimasho iyo dhaawac waxay ka geysteen xerada barakacayaasha ee Buulo Maqaarreey, laba ruux oo kale ayaa la sheegay inay iyaguna ku dhaawacmeen degmada Boondheere, kuwaasoo la sheegay inay ahaayeen waardiyeyaal .

Cabdullahi Xirsi Wardheere, oo ah guddoomiyaha degmada Boondheere ee maamulka gobolka Banaadir ayaa Ergo u sheegay in habeenkii xalay ahaa ay ku mashquulsanaayeen uruurinta iyo daad gureynta dadkii ku waxyeelloobay madaafiicdaasi, kuwaasi oo uu sheegay inay gaarsiiyeen isla habeennimadii isbitalka Keysaneey ee magaalada Muqdisho la geeyay.

Dhinaca kale madaafiicdaan waxyeellada ka geysatay xalay xaafado ka tirsan degmooyinka Boondheere iyo Shibis, ayaa ku soo aadday xilli dagaal saf ballaaran ah uu ka socday xaafado badan oo ka tirsan degmooyinka Yaaqshiid iyo Deyniille ee Gobolka Banaadir, kaas oo u dhexeeyay ciidamada dowladda iyo kuwa Al-Shabaab waxaana uu dagaalku billowday ka gadaal markii ay weerar ku soo qaadeen ciidamo ka tirsan Al-shabaab fariisimo ay xaafadahaasi ku la haayeen ciidamada dowlada Soomaaliya, lamana oga Khasaaraha dhabta ah ee Ka dhashay dagaalkaasi .

Si kastaba ha ahaatee, mararka qaar ayaa magaalada Muqdisho waxaa ka dhaca madaafiic xilli habeennimo ah, iyadoo aan la garanayn halka laga soo ridayo. Waxaana sidaanoo kale xilliyo habeennimo ah madaafiic hoobiyaal ah lagu weeraray xarunta madaxtooyada ee Villa Soomaaliya, inkastoo ay sheegteen Al-shabaab.

Post your comments

LEAVE A REPLY

Please enter your comment!
Please enter your name here