Dadka deggan Kismaayo oo ka cabanaya tuugo

0
30

19 September, 2012 KISMAAYO

Magaalada Kismaayo oo maalmihii aanu ka soo gudubnay ay ka jirtay cabsi dagaal iyo barakac ayaa maanta deggan, iyadoo dhinaca kale ciidamadii ku dagaallamayay duleedka magaalada ay wali isku hor fadhiyaan meel bannaanka ka ah magaalada.

Dhinaca kale habeenkii xalay ahaa ayaa waxaa gudaha magaalada ka jirtay cabsi laga qabay rag la sheegay in laga sii daayay xabsiga dhexe ee degmada, kuwaasoo la sheegay inay gaaf wareegayeen xaafadaha kala duwan ee magaalada, iyagoo doonayay inay dhac u geystaan dadka rayidka ah ee ku haray gudaha magaalada.

“Gabar ka mid ah dadka ku nool xaafadda Faanoole ee degmada kismaayo ayay maqribnimadii xalay kooxo burcad ah ku dhaawaceen xaafaddaasi xilli ay isku dayayeen inay ka qaataan moobilka gacanta.” Sidaana waxaa idaacadda Ergo u sheegay mid ka mid ah dadka ku nool degmada Kismaayo, isagoo intaasi ku daray in gabadhaasi toorrey laga galiyay dhanka bidix.

Dadka ku nool gudaha Kismaayo ayaa la sheegay inay walwal xooggan ka qabaan maxaabiista dhowaan laga sii daayay xabsiga magaalada, iyagoo ka baqanaya in amniga magaalada ay wax u dhimaan.

Si kastaba ha ahaatee, magaalada Kismaayo ee xarunta gobolka Jubbada hoose oo maalmihii la soo dhaafay ay isaga barakaceen qoysas aad u tira badan ayaa hadda xaaladdeedu waxay tahay mid deggan, mana jiraan dhinaca kale wax dagaallo ah oo ka soconaya gobolka, inkastoo ciidamadu ay wali isku hor fadhiyaan meelihii ay ku dagaallameen maalmo ka hor.

CC/MG/FM

Post your comments

LEAVE A REPLY

Please enter your comment!
Please enter your name here