SHIRKA ANSIXINTA DASTUURKA OO MUQDISHO KA FURMAY

0
38

Shirka golaha ansixinta dastuurka ayaa saaka ka furmay hoolka xarunta dugsiga tababarka ciidamada ee Gen. Kaahiye ee  magaalada Muqdisho.

Madaxa shirka ee Muqdisho waxaa diyaar ku ah ku dhawaad 800 oo kamid ah ergada shirka ka qeybgaleysa,  iyadoo  qorshuhu yahay  inay shirka ka qeyb galaan illaa 850 ruux oo ka kala socda  qeybaha ay ka kooban tahay bulshada, madasha shirka  ayaa lagu wadaa inay goob joog  ka noqdaan oo ay soo xaadiraan  mas`uuliyiinta ugu sarreysa DKMG Soomaaliya , wufuud ka kala socota Qaramada midoobay, Midowga Afrika, Urur goboleedka IGAD, iyo dowladaha daneeya arrimaha Soomaaliya.

Waxaa la xiray dhammaan waddooyinka soo gala halka shirku uu ka soconayo, waddooyinka soo gala iyo kuwa kabaxa agagaaraha madasha uu shirka iyadoo dhammaan la xoojiyay ammaanka caasimadda Muqdisho gaar ahaan waddooyinka muhiimka ah ,qaar kamid ah ciidamada ammaanka ayaa lugeynaya waddooyinka  waaweyn ee dhex mara magaalada iyagoo baaraya gaadiidka iyo dadweynaha.

Ergooyinka, marti sharaf iyo bahda saxaafadda ee ku sugan gudaha hoolka halka shirka uu ka soconayo ayaa loo sameeyay kaarar aqoonsi oo ay ku galayaan hoolka shirku ka dhacayo si loo adkeeyo ammaanka.

Yoolka laga leeyahay shirkaan ayaa ah  in ergadaan ay fadhiyaan illaa horraanta bisha soo socota ee  August, marka ay dastuurka meel mariyaanna ay u gudbaan soo xulidda baarlamanka cusub oo tiradiisu saxiixayaasha ay horay isugu raaceen in laga dhigo 225 xubnood,  balse wakiilka xoghayaha guud ee Qaramada midoobay u qaabilsan arrimaha Soomaaliya  Augustine Mahiga  uu sheegay in tirada baarlamaanka laga dhigay 275 xubnood , Kadib soo xulidda baarlamanka  sida ku qoran jadwalka tubta nabadda waa in 4-ta August la doorto  guddoomiyaha cusub ee  baarlamaanka iyo ku xigeennadiisa, halka 20-kana  lagu wado in la doorto madaxweynaha Soomaaliya.

Waxaa soo baxayay maalmihii ugu dambeeyay  warar ku saabsan in qaar kamid ah odayaasha dhaqanku ay isaga baxeen shirka odayaasha maaddaama ay sheegeen in marin habaabin lagu sameeyay qaabkii lagu ballamay, dhinaca kale ergada Puntland ayaa lagu soo warramayaa in aysan soo gaarin madasha shirka.

Si kastaba ha ahaatee shirkaan ayaa ah mid si weyn loo wada sugayay,  iyadoo marar badan uu dib udhac uu ku yimid waxaana dadku dhawrayaan waxa ka soo bixi doona.

Yuusuf Keynaan/MG/CC/FM

Post your comments

LEAVE A REPLY

Please enter your comment!
Please enter your name here