Khatarta hubka iyo walxaha qarxa ee ka hara dagalada oo sii kordhaysa

0
146

Khatarta ay ku hayaan carruurta walxaha qarxa iyo hubka looga tago goobaha lagu dagaalamay ayaa ku sii kordhaysa carruurta, iyadoo dhacdadii ugu danbaysay ay todoba carruur ahi ku dhinteen gobolka Bay.

Geerida carruurtan oo badankood isku qoys ahaa ayaa ka dambeysay kaddib markii ay gacmaha la galeen haraadiga walxaha qaraxa oo ay ka heleen meel aan ka fogeyn goobo ay ku ciyaarayeen oo ka tirsan deegaan 18km dhinaca bari kaga beegan magaalada Baydhabo.
Toddobo carruur ah oo ay ku jiraan 4 isku qoysa ah ayaa ku geeriyootay goobta kaddib markii uu qarax Bam noociisa wali aan la xaqiijinin oo ay ku ciyaarayeen, sida uu Raadiyo Ergo u sheegay Xasan Aadan Xasan oo kamid ah waalidiinta carruurta geeriyootay waxaa goobta ku dhintay 5 carruur ah iyadoo labada kalena ay dhinteen xilli lagu hawlnaa badbaadintooda.

Dhaawacyada carruurta waxyeelladu ay kasoo gaartay bamka qarxay ayaa lagu daweynayaa isbitaalka dhexe ee gobolka halkaasi oo lagula tacaalayo xaaladdooda caafimaad, waxaana saraakiishu ay sheegeen in dadaallo ay wadaan balse xaaladda carruurtu ay tahay mid adag.
Isbitaalka dhexe ee gobolka ayaa dhowaan heley gargaar dawo ah oo ay soo gaarsiisay hay`adda WHO iyadoo wali deegaannada gobolka laga dareemayo xaalado bini`aadannimo oo caafimaadka uu ugu horreeyo.

Waxyaabaha qarxay oo galaaftay nolosha carruurta ayaa lagu sheegay bam ay ka heleen goob ay ku ciyaarayeen kaasi oo la aaminsan yahay inuu qeyb kayahay haraadiga hub wali aan qarxin oo ka harey dagaaladii sanadihii ugu dambeeyay ka dhacay deegaanno ku yaalla gobolka Bay.
Xasan Maxamed Xasan ayaa sharraaxaad ka bixiyey walxaha qarxa oo carruurta ay ku ciyaarayeen qaabka qaraxa uu u dhacay iyo saameynta deegaanka ay ku leeyihiin, maaddaama dhibaato middan la mid ah ay gaarsiin karaan carruur kale oo ku nool halkaasi.

Gargaar helidda dadka nugul oo ay soo gaaraan dhibaatooyin kuwan la mid ah ayaa ah mid aad u liidata, hasee yeeshee qoysaska ayaa dalbanaya in gargaar bini`aadannimo lala soo gaaro gaar ahaan mid caafimaad carruurta dhaawcyada qaba ee u jira isbitaalka gobolka Bay.
Waa khasaarihii nafeed ee ugu ballaarnaa ee ay geysteen miinooyinka iyo walxaha qarxa ee looga tago goobaha lagu dagaallamay ee ka tirsan Baydhabo iyo deegaannada ku hareeraysan, halkaasi oo sanadihii ugu dambeeyay ay ka jireen xaalado nabadgalyo xumo iyo dagaallo sababay barakac saameyn ku yeeshay nolosha dadka.

Inta badan goobaha dagaallada ay ka dhacaan ayaa waxaa laga helaa haraadiga hubka loo adeegsado dagaallada, waxaana sidan oo kale ay u saameeyaan dadka aan aqoonta u lahayn ka hortagga walxaha qarxa oo ku badan goobaha colaaduhu ay ka dheceen.

Badankood dadka deegaannadaasi ku nool waa xoolo dhaqato iyo beeralley mana helin wacyigelin ku saabsan ka hortagga khataraha ka dhalan kara hadddii lataabto waxyaabihii ka haray hubka oo daadsan hareeraha goobaha ay ku nool yihiin.

Hay`adaha ka shaqeeya nadiifinta haraadiga hubka iyo wacyigelinta dadka ku nool goobaha dagaalladu ay ka dhacaan ayaan ka hawlgalin gobollada Bay iyo Bakol tan iyo seddexdii sano ee la soo dhaafay, waxaana jira xaalado ammaan oo u diidaya inay gaaraan deegaannada ka baxsan magaalada Baydhabo oo dhowaan ay dib ugu laabteen qaar ka mid ah hay`adaha samafalka ka shaqeeya.

Wacyigelin ku saabsan qaabka la isaga ilaaliyo khataraha ka imaankara haraadiga hubka ayaa deegaanno katirsan gobolka waxaa horey uga sameeyay hay’ado hoostaga qaramada midoobay iyadoo caruurta haweenka iyo dadka da’da ah loogu muujinayay muuqaalo astaamaha lagu garankaro goobaha khatartu ay kajirto, digniino iyo sida loogu baahanyahay in ay wargeliyaan shaqsiyaad aqoon u leh haddi deegaankooda ay ku arkaan walxo qarxa.

Waxaa la aaminsanyahay in dhibaatooyinka ka dhalankara haraadiga hubka daadsan deegaanada gobolka ay sii kordhi doonaan maadaama ay hooseyso aqoonta dadka deegaanku ay u leeyihiin iyo waliba xiisado horleh oo wali kajira qeybo kamid ah gobolada.

Abdiaziz Abdinor Ibrahim/FM/MH

Wararkii hore ee khatarta walxaha qarxa ka akhriso halkaan

http://www.radioergo.org/so/read.php?article_id=286

 

Post your comments

LEAVE A REPLY

Please enter your comment!
Please enter your name here