HAY`ADDA IMS IYO RAADIYO ERGO OO MAGAALADA GAROWE TABABAR UGU SOO XIRAY 25 WERIYE

0
76

Tababarkani ugu soo gabagaboobey magaalada Garowe ee xarunta maamul-goboleedka Puntland  25-kan warfidiyeen oo ka kala yimid gobollada dalka Soomaaliya ayaa lagu baranayey tabinta wararka ku saabsan bani`aadannimada iyo xog-doonka saxaafadda, wuxuuna soconayey muddo 3-maalmood ah.

Tababarkani waxaa maalgelinayey hay`adda  caalamiga ah ee ka shaqeysa taageeridda warbaahinta ee loo soo gaabiyo ( IMS), iyadoo uu fulinayey Raadiyaha aerimaha bani`aadannimada ee Ergo kaasoo hoostaga hay`addan IMS.

Xafladdii xiritaanka tababarkan oo ay kasoo qeyb galeen mas`uuliyiin ka socotey Puntland, heyadaha warbaahinta iyo bulshada rayidka ayaa looga codsaday weriyeyaasha in kaalintooda ay ka qaataan dib udhiska dalka.

Cabdulqaadir Maxamed Mursal, waa Tifaftiraha Raadiyo Ergo wuxuuna mahad celin ujeediyey cidkasta oo qeyb ka qaadatey siduu u qabsoomi lahaa tababarkan “Muddo 3-maalin ah laguma koobi karo casharrada la idin barayey, hayeeshee ujeeddada waxay aheyd in albaabada la idin furo, dhammeystirka cilmiga la idiin bareyna aad idinku la timaaddaan, ugu dambeyntii waxaan u mahad celinayaa macallimiintii halkan casharrada ka soo jeedisey oo diyaarintoodii iyo soo gudbintoodii aan filayo in aad ka faa`iideysateen, guud ahaan waxaan kaloo u mahad celinayaa maamulka iyo dadka reer Puntland oo markasta gacan naga siiya sidii ay noogu qabsoomi lahaayeen tababarrada aan ku qabamno magaalooyinka Puntland.“

Sheekh Cabdirisaaq Xuseen Ciise oo ka mid ah culumaa`udiinka Puntland kana mid ahaa dadkii kasoo qeyb galay xafladdan tababarka loogu soo xiraayey suxufiyiintan, ayaa ku amaaney weriyeyaasha Soomaalida dadaalka dheer ee ay u galeen sidii ay bulshadooda ula socodsiin lahaayeen wacyiga taagan markasta, isagoo ku dhiiri geliyey weriyeyasha in wararka iyo barnaamijyada ay baahinayaan ay noqdaan kuwo hufan oo aan uga imaan wax khalad ah.

Agaasimaha guud ee wasaaradda warfaafinta maamulka Puntland, Suleymaan Siciid oo ka hadlay madasha xafladda xiritaanka ayaa ku amaanay hay`adda IMS iyo Raadiyo Ergo kaalinta ay ka qaataan kor uqaadidda aqoonta warfidiyeennada Soomaaliyeed, isagoo sheegay in wasaaraddiisa ay soo dhoweyneyso in weriyeyaashu ay helaan tababarro noocan oo kale ah.

Guddomiyihii hore ee gobolka Bari Sheekh Cabdixaafid Cali Yuusuf ayaa isagana sheegay in weriyeyaashu maanta ay yihiin bartilmaameed, loona baahan yahay inay foojignaadaan.
Weriye Cumar Xabeeb Nuur (Teacher) oo ka mid ahaa weriyeyaashii ka faa`iideystay tababarkan, ayaa sheegay in muddadii uu usocdey tababarkan ay ka faa`iideen aqoon la xiriirta saxaafadda.

Hay`adda IMS iyo Raadiyo Ergo ayaa sanad walba u qabta suxufiyiinta Soomaaliyeed tababarro qeyb ka ah dadaal loogu jiro sidii sare loogu qaadi lahaa xirfadda suxufiyiinta, iyadoo tababarkani uu ka taageeri doono how lahooda shaqo.

Axmed Nuur Soomaali/FM

Post your comments

LEAVE A REPLY

Please enter your comment!
Please enter your name here