Xaalada Afmadow oo degan iyo meheradii ganacsiga oo weli xiray

0
71

01 June, 2012 JUBBADA HOOSE

Kadib dagaallo maalmo badan ka socday dulleedka degmada Afmadow ee gobbolka Jubbada Hoose ayaa ciidamada huwanta kana kala socda dowladda KMG Soomaaliya iyo kuwa Kenya waxaa u suura gashay inay si nabad galya ah kula wareegeen.

Mid kamid ah dadka ku haray magaalada Afmadow oo u waramay Raadiyaha Ergo ayaa sheegay inaysan jirin wax dhaq dhaqaaq ah oo dhanka arrimaha bulshada ah oo ka jira magaalada, isagoona intaasi ku daray inay xirmeen goobihii ganacsiga, waxbarashada iyo isu socodkii dadweynaha.

“Xaalada magaalada aad ayay u qasantahay, waxaa magaalada soo galay ciidamo aad u fara badan oo wata taangiyo iyo dabaabaadka dagaalka, dadka yar ee magaalada ku haray aad ayay uga cabsanayaan isbedelka yimid, xarumihii ganacsiga iyo adeegyadii dadweynaha dhamaan way istaageen,”ayuu yiri qof kamid ah dadka yar ee ku suggan magaalada Afmadow.

Dhanka kale Maxamed Faarax Daahir oo ah Afhayeenka Ciidamada dowladda KMG ah Soomaaliya ee qabsaday degmada Afmadow ayaa waxaa uu Radio Ergo u sheegay inay magaalada galeen ayadoo aanan wax dagaal ah ka dhicin, isagoona intaasi ku daray inaysa jirin dad rayid ah oo wax ku noqday dagaaladii ka dhacaayay hareeraha magaalada.

Mr Faarah Afahayeenka dowladda ayaa sidoo kale sheegay in dadkii ka barakacay magaalada ay ugu baaqeen inay ku soo laabtaan guryahooda oo ay ganacsigoodii iyo noolashoodii ay dib u bilaabaan.

“Magaalada maalmaha soo socda waxaan u sameyn doonaa qorshe aan ku soo celineno maamulkii iyo kala dambeyntii, dadka waxaan ugu baaqeynaa inay ku soo laabtaan guryahooda oo ay is dajiyaan,” ayuu yiri Afhayeenka oo Radio Ergo u waramaayay.

Degmada Afmadow ayaa ah degmo deegaan ahaan aad u ballaaran islamarkaana ay ku noolyihiin dad u badan xoolo dhaqato, inkastoo ay jiraan ganacsato iyo beeraley waxaana degmadu ay 120km u jirtaa magaalada dekadda leh ee Kismaayo.
Khadar Mohamuud/MH

Post your comments

LEAVE A REPLY

Please enter your comment!
Please enter your name here