Qaxooti ka tegay dhadhaab oo gaaray degmada ceelwaaq ee gedo

0
78

Masuuliiyinta degmada Ceelwaaq ayaa sheegaya in boqollaal qaxooti Soomaaliyeed oo ku jiray xeryaha Dhadhaab ee dalka Kenya ayaa billaabay inay dib ugu soo laabtaan deegaannadooda, kadib markii sida ay sheegeen ay u adkeysan waayeen xaalado is biirsaday oo isugu jira nolol xumo iyo amni darro.

Guddoomiye ku xigeen degmadda Ceelwaaq Sahal Macallin Aadan ayaa Ergo u sheegay in degmada ay soogaareen ilaa 9 baabuur oo ay saaran yihiin dad ka badan ilaa 240 oo qoys oo qaxooti ah ayna ka muuqato daal iyo diif, gudoomiye ku xigeenka ayaa sheegay inay dadku ka soo noqonayaan xeryaha Dhadhaab kuliigoodba, ayna yihiin dadkii deegaanka.

Amino Mahad oo ka mid ah qoysaska ka soo noqday xeryaha qaxootiga Kenya, gaar ahaan xerada IFO dhowaanna soo gaaray degmada Ceelwaaq ayaa Ergo u sheegay in ammaan darrida ka jirta xeryaha qaxootiga ay ku qasabtay inay dib ugu soo noqdaan deegaanka oo markii hore ay abaaro iyo colaado darteed uga Barakaceen.

“Muddo 3 sano iyo bar ayaan degganaa xerada Ifo aniga iyo qoyskeyga oo ka kooban 9 ruux, markii horena waxaan ka mid ahaa Qoysaska Abaaro iyo dhibaatooyin nolol xumo ayaa igu qasbay in aan galo xeryaha qaxootiga Kenya, arrimaha kufsiga oo si baahsan uga jira xeryaha iyo amaandarida ayaana ugu sii daran waxa nagu kallifay inaan dib u soo noqonno”.

Aadan Khayr oo ah sarkaal trisan hay’adda COSOVI oo isna ku sugan Ceelwaaq ayaa isna cadeeyey inay jiraan dadka soo noqday tiradooduna ka qiyaasay ilaa 200 oo qoys, horayna ay u ahaayeen kuwii abaaraha uga qaxay gobolka, wuxuu kaloo cadeeyey Aadan inay dadkaan qaarkood ku biireen xeryaha ay ku jiraan dadka guddaha ku barakacsan ee Ceelwaaq ka dhisan, ilaa haddana ma jiraan wax gargaar ah oo la gaarsiiyey, iyadoo hay’addaha gargaarku ay horay ugu mashquulsanaayeen barakacayaal horay ugu sugnaa degmadda.

Amino ayaa waxay intaasi ku dartey dhibaatooyinka ay qabaan inay ugu weyn tahay hoy la`aan, cunno la`aan iyo caafimaad darro. iyadoo sheegtayna in haddii ay xaaladdu sidaan ku sii socoto ay dhalan karaan goobaha ay kaga sugan yihiin Ceelwaaq cudurro iyo macluul baahsan,mana jirto ayey tiri ilaa iyo iminka cid noo fidisey Gargaar Bini,aadinimo.

Qaxootigan soo gaarey Ceelwaaq oo maalinba maalinta ka dambeysa ay tiradooda sii kordheyso ayaa waxay inta badan ku biireen qoysas kale oo horey u deganaa xeryaha Barakacayaasha ee ku yaala duleedka Ceelwaaq,ilaa iyo hadana tirokoob ay sameeyeen horjoogayaasha Barakacayaasha Ceelwaaq iyo ururada samafalka ayaa waxay tiradoodu ku sheegayaan in ay gaarayaan ilaa 600 oo ruux sida uu Ergo u sheegay Aden Derow gudoomiya xeryaha barakacayaasha ee degmadda Ceelwaaq oo hadda dadka soo noqday ku biirayaan.
@

Qoysaskan dib ugu soo laabanaya Deegaanadooda ayaa degaya deegaanno aysan horeyba uga jirin adeeg nololeed,mid Caafimaad iyo hay`ado Gar gaar.
AO/MH/FM

Post your comments

LEAVE A REPLY

Please enter your comment!
Please enter your name here