Tahriibayaal Soomaali ah oo ku xirxiran waddanka Malaawi

0
87

09 March, 2012  MOZAMBIQUE

Wararka ka imaanaya waddanka Malawi ayaa sheegaya in halkaasi lagu xiray muhaajiriin Soomaali ah. 27 qof oo Soomaali ah ayaa la xaqiijiyey inay ka mid yihiin tiro dad ajaanib ah oo ciidanka ammaanka waddankaas ay meelo kala duwan ka soo qab qabteen, dadkaan ayaa hadda xiran muddo 15 maalmood ah, waxaa kaloo jira dad badan oo dhinaca xadka Malaawi iyo Tansaaniya ku xiran oo aan tiradooda si sugan loo hayn.

Weriyaha Ergo ee waddanka Musambiig, Faarax Dubbad, ayaa sheegay in magaalo xadka ku taal oo la yiraahdo Milanchi la isugu keenay dad laga soo ururiyey guddaha dalkaasi.

Dadka Soomaaliyeed ee tahriibka ugu socda waddanka Koonfur Afrika, ayaa hadda marinkooda ka dhigtay dhinaca Malaawi ka dib markii dowladda Musambiig ay adkaysay arrimaha dhaqdhaqaaqa dadka qaxootiga gaar ahaan xadka ay la wadaagto Koonfur Afrika, ciidanka booliiska Malaawi ayaa iyana xaqiijiyey inay hayaan 70 qof oo muhaajiriin Soomaali iyo Itoobiyaan isugu jira, waxaana jira oo kale boqollaal qof oo ku dhibaataysan goobaha xuduudaha u dhexeeya waddamada Musabiig iyo Malaawi, ayna ku adkaatay inay u tallaabaan dhinaca Malaawi.

Cabdiweli Maxamed Jaamac, oo ka mid ah dadka maxaabiisata ayaa Raadio Ergo u sheegay in muddo 2 maalmood ah lagu hayay goob kayn ah oo ka fog magaalooyinka, halkaasoo markii dambe loo soo gudbiyay xuduudka Musambiig oo ay dowladda Malaawi rabto inay dib ugu soo celiso, Cabdiweli ayaa sheegay inay u socdeen dhinaca waddanka Koonfur Afrika, ayna ahaayeen 12 dhalinyaro oo la wada qabtay.

Waddanka Malaawi waxaa dhowaan laga aasaasay xero qaxooti oo ay hay`adda qaxootiga qaramada midoobay ee UNHCR dejisay dad jinsiyado kala duwan leh, kuwaasoo Malaawi ay u aqoonsatay inay yihiin qaxooti, waxaa kaloo jira boqollaal kale oo iyana ku sugan xero ku taal Musambiig, xeradaas oo ah goob ay ku sii hakadaan dadka si ay ugu sii safraan dhianca koonfureed ee qaaradda.
Farax Dubad/MH/FM

Post your comments

LEAVE A REPLY

Please enter your comment!
Please enter your name here