Wasiirka kalluumaysiga Puntland “tababarro xirfaddaha kalluumaysiga ayaanu xeebaha ka qabanay”

0
140

Puntland:- Maamul goboleedka Puntland, ayaa sheegay in ay wadaan tababarro ku saabsan habka kalluumeysiga,,kaasoo ay sheegeen in ay ka wadaan deegaanno ku teedsan xeebaha Puntland.
Wasiirka kalluumaysiga iyo khayraadka badda Puntland Injineer Maxamed Faarax Aadan, ayaa waraysi uu siiyay Raadiyo ERGO isagoo ku sugan degmada Eyl ee gobolka Nugaal, wuxuu sheegay inay deegaannada ku teedsan xeebaha Puntland ay ka wadaan tababarro ku saabsan habka kalluumaysiga.

Wasiirku waxaa uu tilmaamay in tababarradaan ay ka fulinayaan magaalooyin ku yaalla Puntland, kuwaasoo ay ka mid yihiin,Eyl, Caluula, Baargaal, Bayla, iyo Garacad. Waxaana sidoo kale uu sheegay inay jireen tababarro hore oo ay siiyeen illaa dad kor u dhaafaya 50 qof, kuwaasoo ah shaqaalaha iskaashatooyinka kalluumaysiga Puntland.

Waxaa sidoo kale uu wasiirku shaaca ka qaaday, in casharradaan ay bixinayaan macallimiin ajaanib ah, kuwaasoo sida uu sheegay ku takhasusay cilmiga badaha iyo habka kalluumaysiga, Wasiirku waxaa uu hadalkiisa raaciyay in markii uu dhammaado tababarkaan sidoo kale la bari doono dhalinyaradaan habka loo xalliyo cilladaha ku yimaada doonta, xilliga ay ku dhex shaqaynayso badda” tababarkaan wuxuu daba socdaa tababar hore, waxaana lagu baranayaa habka kalluumeysiga, sida haddii badda gudaheeda wax lagu noqdo looga badbaadi lahaa, sida kalluunka loo qalo oo loo barafeeyo iyo dhammaan aqoonta badda”.

Wuxuu wasiirka mahad ballaaran u jeediyay hay’adda Qaramada Midoobay u qaabilsan beeraha iyo cuntada ee FAO, iyo hay’adda UNDP oo uu sheegay inay ka caawiyeen tababarradaan.
asiirku wuxuu rajo wanaagsan ka muujiyay inay taabba galayso ujeeddooyinka iyo hadafka la xiriira horumarinta xirfadda kalluumaysiga, maadaama aysan Puntland lahayn Machad ama goob hadda lagu barto xirfadda kalluumaysiga.Wuxuu sheegay in qalab ay ku shaqaystaan dhallinyaradaani ay wasaaraddu siin doonto markay tababarrada dhamaystaan. wuxuu caro ka muujiyay dhallinyarada ka midka ah burcad-badeedda kuwaasoo uu ku tilmaamay kuwo meel uga dhacay sumcaddii iyo sharaftii ummada Soomaaliyeed mustaqbalkoodana aanu wanaagsanayn .

Ugu dambayntii wasiirku wuxuu sheegay inay jiraan maraakiib shisheeye oo had iyo goor si sharci darro ah u gurata ugana qaraabata khayraadka dabiiciga ah ee badda Soomaaliya, waxaana wasiirku uu sheegay inaysan DKMG ee Soomaaliya iyo maamulkooduba lahayn gaadiidkii ilaalada badda Soomaaliya iyo quwad ay isaga celiyaan maraakiibtaasi sharci darrada ku guranaysa khayraadkii dabiiciga ahaa ee dhex ceegaagay baddeenna,isagoo beesha caalamka ugu baaqay inay dhibaatadaasi wax ka qabtaan.

 

Mohamed Abdullahi Kooshin/AA/MG/FM

Post your comments

LEAVE A REPLY

Please enter your comment!
Please enter your name here